தமிழ் சமூகத்தின் கட்டமைப்பை உடைக்கும் போதைப் பொருள் பாவனை அதிகரிப்பு!!! - Yazhpanam

Yazhpanam

Tamil News, Jaffna News, jaffnaradio, thamizh news, jaffna, killinochi, vavuniya, Colombo, Batticaloa, Trincomalee, North, east, west, south, tamilnews, yazhpanam, Jaffna TV, jaffnatv

Home Top Ad

Post Top Ad

Your Ad Spot

Monday, January 15, 2018

தமிழ் சமூகத்தின் கட்டமைப்பை உடைக்கும் போதைப் பொருள் பாவனை அதிகரிப்பு!!!

சமூக சிதைவு என்பது ஒரு இனத்தின் கலாசார விழுமியங்களின் சீரழிவிலிருந்து பிறப்பெடுக்கின்றது. இத்தகைய சீரழிவுக்கு தூண்டுகோலாக விளங்கும் காரணிகளில் பிரதானம் பெறுபவை மது, புகைத்தல், மற்றும் போதைப் பொருட்களின் அதீத பாவனைகள் எனலாம்.
தற்கால தமிழ் சமூகத்தில் கட்டுப்படுத்த முடியாதளவிற்கு ஆழப்புரையோடியுள்ள இவ்வாறான துர்பாவனைகள், இவற்றின் தொடர்ச்சியாகப் பெருக்கமடைந்து வருகின்ற சமூக விரோத செயற்பாடுகள் அதாவது குற்றச்செயல்கள், அநீதிகள், அதர்ம காரியங்கள் முதலியவை நாட்டையே அபாயகரமான சூழலுக்குள் தள்ளிவிட்டுள்ளன.
வட மாகாணமே அதிலும் குறிப்பாக யாழ். மாவட்டமே மதுப் பாவனைகளில் மகத்தான இடத்திலிருக்கின்ற சாதனையையும் தக்கவைத்திருக்கின்றதெனில் எமது இனம் எங்கு நிற்கின்றது என்பதை அறிய முடியும். ஒரு நாட்டின் நிலைத்து நிற்கக்கூடிய அபிவிருத்திக்கு கனதியான பங்களிப்பை நல்குவது இளவயதுப் பிரிவினரேயாகும். அத்தகைய வயதினரின் ஊழியமானது வீணடிக்கப்படுவதையும் அது தவறான திசையை நோக்கித் திருப்பப்படுவதையும் காணக்கூடியதாக உள்ளது.
இந் நிலைமை மேலும் தொடராதிருக்கவும் சீரழிந்து வருகின்ற இன்றைய இளம் சந்ததியை மீள்கட்டமைக்கவும் சட்டம் ஒழுங்குகளை இறுக்கமடையச் செய்ய வேண்டியது மிகவும் அவசியமானதாகிறது.
சமகாலத்தில் மது, புகைத்தல், போதைப் பொருட்களின் மீதான நுகர்வு நாட்டமானது இளையோர் மத்தியில் அசாதாரண ரீதியாக பல்கிப் பெருகி வரும் நிலைமையானது எமது சமூகத்தினுடைய முதுகெலும்பின் உடைவுக்கு வழிவகுத்துள்ளது.
தற்போதைய ஊடங்களின் பேசுபொருளாகவும் பிரதானம் பெறுகின்ற செய்தியாகவும் விளங்கிவருகின்ற இப் பிரச்சினைகளானவை எதிர்காலத்தில் நம் சமூகத்திற்கு ஏற்படப்போகும் ஆபத்துக்களுக்கு கட்டியம் கூறி நிற்கின்றதெனில் அதில் மாற்றுக் கருத்துக்கு இடமில்லை. உலகமயமாக்கல் என்ற எண்ணக்கருவின் விளைவாக பல நன்மையான விடயங்கள் அறுவடை செய்யப்படினும் குறிப்பிடத்தக்கவாறான சில எதிர்கணியமான தாக்கங்களும் உணரப்பட்டு வருவதனைக் காணக்கூடியதாக உள்ளது.
இவற்றை நாம் சாதாரண சம்பவங்கள் போல கருதி விட்டுவிட முடியாது. ஒவ்வொரு தாக்கத்திற்கும் சமமானதும் எதிரானதுமான மறுதாக்கம் உண்டென்பதனை உணர்ந்து அவற்றை நிவர்த்திக்க வேண்டிய பாரிய பொறுப்பு சம்பந்தப்பட்டவர்களுக்குண்டு.
மனித சமூகத்தை சீரழிக்கும் இவ்வாறான துர்ப்பாவனைகளின் கருக்கொள்ளலைக் கருவறுப்பதென்பது இலகுவான விடயமல்ல. உள சமூக பிரச்சினைகளாக நோக்கப்படும் இத்தகைய அதீத பாவனைகளுக்கு தூண்டுகோலாக விளங்கும் முக்கியமான காரணிகளைப் பார்த்தோமேயானால் சூழல்,காலம்,வயது,பால், தனிமனித ஆளுமை குடும்ப, சமூகக் காரணிகள் மற்றும் தகவல் தொடர்பு சாதனங்கின் அதீத பாவனைகள் போன்றவை இவ்வாறான துர்ப்பாவனைகளைத் தூண்டுபவையாக விளங்குகின்றன.
இவற்றை மிகவும் சுருக்கமாக நோக்கின், தற்போது காலமாற்றத்திற்கேற்ப நாம் வாழும் காலமும் சூழலும் மாற்றம் கண்டு வருகின்றன. எமது சமூகத்தினைப் பொறுத்தவரையில் கலாசாரக் கட்டுடைவின் விளைவை அனுபவித்து வரும் இவ்வேளையில் எம் இனத்தின் இருப்பும் கேள்விக்குள்ளாகியிருக்கின்றது.
இனத்துவ அடிப்படையிலான முரண்நிலைகள் வலுக்கொள்ளும் போதும் ஒரு இனத்தின் அடிப்படை உரிமைகள் மறுக்கப்பட்டு - பறிக்கப்பட்டு அதிகார வர்க்கத்தின் ஆதிக்கம் மேலெழும் போதும் ஒடுக்கப்பட்ட இனத்திலிருந்து வெளிக்கிளம்பும் எதிரான உணர்வலைகளைக் கட்டுப்படுத்தவும் அவற்றின் செயல் வீச்சத்தை கட்டுப்படுத்தவும் எழுச்சியுடனான பயணிப்பினை திசைமாற்றவும் அதிகார வர்க்கம் முதலாளித்துவ சிந்தனையின்பாற்பட்டு கையாளும் உத்திகளுள் ஒன்றாக விளங்குவது, ஒடுக்கப்படும் இனத்தின் பண்பாட்டில் - இன அடையாளங்களில் சிதைவை ஏற்படுத்துவதாகும்.
கடந்த கால யுத்தப்பாதிப்பின் விளைவாக மக்களின் இயல்பு வாழ்க்கையானது பாதிக்கப்பட்டிருக்கும் இவ்வேளையில் அவர்களது உளவுரணைச் சிதைத்துள்ள யுத்தப் பாதிப்பிலிருந்து மீண்டெழுவதற்கான வடிகாலாக மது மற்றும் போதைப் பொருட்கள் மீது தமது நாட்டத்தை செலுத்துவர். இது எல்லோருக்கும் பொருந்தும் பொது இயல்பாகும். இது போன்ற துர்நடவடிக்கைகளுக்கான களத்தை, சந்தர்ப்பத்தை, வாய்ப்பு வசதிகளை ஏற்படுத்திக் கொடுக்கையில் அவற்றின் பாவனை வீச்சமானது வேகமாக உயர்வடையும்.இந்நிலையானது தொடரும் போது நீண்ட காலத்தில் சமூகக் கட்டமைப்புச் சிதைவை ஏற்படுத்தும்.
அடுத்து ,வயது மற்றும் பால் போன்ற காரணிகளை நோக்கினால், இளவயதுப் பிரிவினரிடத்தே அதிலும் ஆண்களிடத்தே இத்தகைய போக்குகளுக்கு அடிமைப்படும் தன்மை அதிகம் காணப்படுகிறது. இவர்கள் நன்மை தீமைகளை பகுத்தாய்ந்துணரும் மனப்பாங்கு குறைந்தவர்கள்,எதிலுமே வேகம், ஆர்வம் தூண்டற்பேறு, எளிதில் உணர்ச்சிவசப்படும் தன்மை, எதையுமே ஆராய்ந்து பார்க்க வேண்டும் என்ற ஆவல், துடிப்பு மற்றும் வன்முறை மீது அதிக நாட்டம்; காணப்படுவதுடன் எதிர்காலம் பற்றிய பிரக்ஞை, வாழ்க்கை பற்றிய புரிதல்கள், பொறுமை என்பவை மிகவும் குறைவாகவே காணப்படும்.
இவர்களின் எதிர்காலத்தை தீர்மானிப்பதற்கான அடித்தளமானது நிர்ணயம் செய்யப்படுவது இவ் வயதிலேயேயெனலாம். எனவே இவ்வாறான தீய பழக்கங்களுக்கு எளிதில் ஆட்படும் வயதினராக காணப்படுவதனால் மது, போதைப் பொருட்களின் பாவனை வீதமானது இந்த வயதினரிடையே அதிகம் காணப்படுகின்றமை குறிப்பிடத்தக்கதாகும். அதுமட்டுமன்றி இவ்வகையான துர்ப்பாவனைகளுக்கு அடிமைப்படுவோர் இலகுவில் அவற்றிலிருந்து விடுபடமுடியாது வாழ்க்கை முழுவதும் நிழல் போல தொடரும் அபாயமும் உண்டென்பதை மறுதலிக்க முடியாது.
மேலும் ஒருவரது தனிமனித ஆளுமைப் பிறழ்வுளும் இத்தகைய பொருட்களின்பால் மனமானது ஈர்க்கப்பட காரணமாகின்றது. மனித ஆளுமையானது ஒருவனுக்கு பிறப்பிலிருந்தே அமையும் தன்மை பொருந்தியதுடன்; அதன் வளர்ச்சியானது சிறுபிராயத்திலிருந்தே ஆரம்பிக்கின்றது. மேலும் பரம்பரையலகுகளும் மரபியல்சார் விடயங்களும் காத்திரமான பங்கினை வகிக்கின்றன.
பெற்றோர் இத்தகைய தீய பழக்கங்களுக்குட்பட்டிருப்பின் அவர்களது சந்ததிக்கும் கடத்தப்படும் அபாயமும் உண்டென்பதுடன் குடும்பத்தில் மட்டுமல்லாது உறவினர்கள், அயலவர்கள், நண்பர்கள் முதலானோருக்கு இப் பழக்கங்கள் இருக்கும்போது அதனைப் பின்பற்றி ஏனையோரும் தொடரும் நிலைமையும் உண்டு. மேலும் இன்றைய நவீன தொழிநுட்ப வளர்ச்சியின் விளைவாகவும் இவற்றுக்கு அடிமைப்படும் பண்பும் பலமாக காணப்படுகிறது. அதாவது தற்கால நவீன திரைப்படங்கள், தொலைக்காட்சித் தொடர்கள், இணையத்தளங்கள் குறிப்பாக சமூக வலைத் தளங்கள் மற்றும் கைத்தொலைபேசிகள் முதலானவற்றின் தவறான பயன்பாடுகள் அதிகரித்து வருவதானது இவற்றுக்கு அடிமையாகும் சாத்தியத் தன்மையை அதிகரித்துள்ளது.
இத்தகைய ஊடக சாதனங்களின் பயன்பாடுகள் வேகமெடுத்து வருகின்றமை மக்களின் பெறுமதியான நேரத்தினை விழுங்கி வருகின்றமை துரதிஸ்டவசமானது. தற்போதைய திரைப்படங்கள் மற்றும் சின்னத்திரைகளில் காட்சிப்படுத்தப்படுகின்ற விடயங்கள் அனைத்தும் மக்கள் மனங்களில் நச்சு விதைகளையே விதைக்கின்றன.
தற்போது அத்தியாவசிய தேவையாகிவருகின்ற இக்காண்பிய வடிவங்களில் சமூகமாற்றத்தை ஏற்படுத்தும் மனித விழுமியக் கூறுகள் மற்றும் ஆக்கபூர்வமான விடயங்கள் என்பவை கானல் நிராகி வருவதுடன் மனித சமூகத்தை சீரழித்துவருகின்ற மது, புகைத்தல், போதைப்பொருட்களின் பாவனைகளுக்கான தூண்டல்களுக்கு அதிகம் தூபமிடப்படுகின்றன எனலாம்.
உடல், உள, சமூக ரீதியில் பாதிப்பை ஏற்படுத்தும் “மது, போதைக்கு அடிமையான நிலை” என்பதற்கான விளக்கத்தை விபரிக்கையில் National council on Alcoholism and Drug Dependence எனும் சர்வதேச அமைப்பானது கீழ்வருமாறு விபரித்துள்ளது. “மதுவைக் குடிக்கும் அல்லது போதையை உள்ளெடுக்கும் பழக்கத்தில் கட்டுப்பாடின்மை, எப்போதுமே மது, போதைவஸ்து சார்ந்த நினைப்பு, தீங்கு விளைவிக்கும் ஏது நிலைகள் இருந்தபோதும் கூட அவற்றை உள்ளெடுப்பது மற்றும் சிந்தித்தலில் நிலை குலைவு போன்ற அறிகுறிகள் கொண்ட முதன்மையான நீடித்த நோய்” என வரையறுத்துள்ளது. ‘Diagnostic and Statistical Manual of Mental Disorders’ என்றஉளவியல் பருவ இதழில் “பாதக விளைவுகளிலிருந்தும் திரும்பத்திரும்ப அளவுக்கதிகமாகவும் தவறாகவும் பயன்படுத்துவதையும் அவற்றை பயன்படுத்துவதை திடீரென நிறுத்தினால் ஏற்படும் அறிகுறிகள் எதிர்விளைவுகள் தென்படல் மற்றும் பயன்படுத்துவதிலுள்ள அடக்கமுடியாத பேராசை போன்றவற்றின் ஒருங்குசேர்ந்த அணுகுமுறையை அடிமை: தங்கியிருக்கும் நிலை எனக் குறிப்பிடப்படும்.
இத்தகைய துர்ப் பாவனைகளினால் ஏற்படும் உடல்சார்ந்த விளைவுகளை நோக்குகையில் கல்லீரல் பாதிப்பு கணைய அழற்சி, காக்காய் வலிப்பு, பன்மை நரம்புகளின் இயக்கத்தடை (polyneuropathy) மதுசார் மறதிநோய், அறிவாற்றல் இழப்பு, இதய நோய்கள், ஊட்டச்சத்து குறைபாடுகள், வயிற்றுப்புண், பால்வினை செயல்ப்பிறழ்வு, இதயக்குழாய் நோய்கள், நரம்புமண்டல பாதிப்புகள் கடுமையான புலனுணர்வு சார் பிரச்சினைகள் மற்றும் புற்றுநோய் போன்றவை ஏற்படுவதுடன் இறுதியில் மரணம் கூட சம்பவிக்கலாம்.
இவற்றின் பாவனைகளால் எற்படும் உளம் சார்ந்த சீர்குலைவுகளை நோக்குகையில் நீண்டகாலத்திற்கு மது, போதைப்பொருட்களை பயன்படுத்துகையில் பலவகையான மனநல பாதிப்புகளுக்கு ஆளாக நேரிடலாம். தொடர் பாவனையால் உடலில் நச்சுத்தன்மை அதிகரித்து மூளையின் செயற்பாட்டை பாதிக்கும். இதனால் மனநிலை வெகுவாக பாதிப்படையும். பொதுவாக மனக்கலக்கம்,சிந்தனைக்குழப்பம்,மனப்பதட்டம், தவிப்பு, மனச்சோர்வு, மன அழுத்தம்,மன அமைதியின்மை, ஆளுமைச்சிதைவுள் போன்ற மனச்சீர்கேடுகள் ஏற்படும். அத்துடன் இவற்றைத் திடீரென நிறுத்துகையிலும் இதுபோன்ற மனப்பாதிப்புகளை சந்திக்க நேரிடும். எனவே படிப்படியாகத் தவிர்க்கும்போது இவை மறைந்துவிடும்.
மேலும் மூளையில் நரம்பு வேதியல் முறை பாதிப்படைந்து மனச்சிதைவு நிலை தோன்றலாம். மது,போதையை நிறுத்தியபின்பும் தொடரும் சாத்தியமும் உண்டு. கடுமையாக இவற்றிற்கு அடிமையானவர்கள் தற்கொலை செய்வதற்கான வாய்ப்புகளும் அதிகமுண்டு. இவர்கள் தற்கொலை செய்வதற்கான சூழிடர் நிலை அதிகமிருப்பதற்கான காரணம், மூளை வேதியல் மாற்றமடைந்து உயிரியல் சார் உருக்குலைவு, சமூகத்தினின்றும் தனிமைப்படல், மிகையச்சம் என்பவற்றால் தற்கொலை முயற்சியில் இறங்குவதற்கான தூண்டற்பேறு அதிகமாக இருக்கும்.
பொதுவாக இளவயதினரே அதிகம் தற்கொலை முயற்சியில் இறங்குகின்றனர். மேலும்,இன்று உலகில் நடைபெறும் தற்கொலைகளில் 50 சதவீதமானவை மது, போதைக்கு அடிமை நிலையினால் ஏற்படுவதாக ஆராய்ச்சி முடிவுகள் வெளிப்படுத்தி நிற்கின்றன. சுருங்கிய தீர்வுகளுடன் கூடிய அவசரமான முடிவெடுக்கப்படுவதற்கு மனம் உந்தப்படுவதால் வாழ்வமைதி சீர்கெட்டு தற்கொலையில் ஈடுபட எத்தனிக்கின்றனர்.
இறுதியாக போதை தருகின்ற போதையால் பாதை மாறும் இளைஞர்களுக்கு வழிகாட்ட வேண்டிய பொறுப்பு சமூகத் தலைவர்களை சார்ந்தது.இன்றைய இளைஞர்கள் எதிர்காலத்தின் சிற்பிகள். நாளைய சமூகத்தை வழிநடத்த வேண்டியவர்களே இன்று பாதை மாறிச்செல்லும் போது நம் எதிர்கால சந்ததியின் நிலை பரிதாபகரமானதாகவே இருக்கப் போகின்றது. இன்று நடைபெற்றுவரும் குடும்பவன்முறை அதனால் விளையும் விவாகரத்துகள், அவர்களது பிள்ளைகள் எதிர்கொள்ளும் சமூகச் சிக்கல்கள், சமூக விரோத செயற்பாடுகள், வீதி விபத்துகள் அவற்றின் வழியான உயிர் அவயவ இழப்புகள், பொருளாதார நெருக்கடிகள், சமூகத்தில் இவர்களுக்கிருக்கும் ஆறாத வடு என பிரச்சினைகள் நீண்டுகொண்டே செல்கின்றன. அத்துடன் பாலியல் வன்முறைகளும் உச்சம் பெறுவதுடன் சிறுவர் பாலியல் துஸ்பிரயோகங்களும் வகைதொகையின்றி நடைபெறுவதற்கும் சிறைச்சாலைகள் அத்தகைய குற்றங்களால் நிரம்புவதற்கும் வழிசமைக்கின்றன. உலக சுகாதார நிறுவன தகவலின்படி, நாட்டின் மொத்த உள்நாட்டு உற்பத்தியில் 5 வீதமான செலவுகள் மதுப்பாவனைகளால் ஏற்படும் விளைவுகளைச் சரிசெய்வதற்காக செலவழிக்கப்படுவதாக கூறப்படுகிறது.
எனவே சமூகத்தை ஏன் நாட்டையே சீர்குலைவுக்குள்ளாக்கும் இத்தகைய மது, புகைத்தல், போதைப்பொருட்களின் பாவனைகளை கட்டுப்படுத்துவதற்கு அரச மற்றும் அரச சார்பற்ற நிறுவனங்கள் அதிகம் சிரத்தை கொள்வதுடன், நாட்டின் நீதித் துறையானது விழிப்புடன் செயற்பட்டு சட்டம் ஒழுங்ககளை இறுக்கமடையச்செய்து கட்டுப்படுத்த முன்வரும்போது நாட்டில் நடைபெறும் குற்றச்செயல்கள் பெருமளவால் குறைந்து எமது நாடு சொர்க்கபுரியாக திகழும் என்பதில் எவ்வித ஐயமுமில்லை.    

                                                                                          © Copyright Malarum 

No comments:

Post a Comment

இங்கு கூறப்படும் கருத்துக்களுக்கு எவ்வகையிலும் நிர்வாகம் பொறுப்பாகாது,
www.Yazhpanam.com

யாழ் நூலக எரிப்பு நினைவு தினம்: "தமிழ் இன அழிப்பின் அடையாளமே யாழ் நூலக எரிப்பு"

தெற்காசியாவின் அறிவுக் களஞ்சியமாக போற்றப்பட்ட யாழ்பொது நூலகம் எரிக்கப்பட்டு இன்றுடன் (வெள்ளிக்கிழமை)37 ஆண்டுகள் கடந்தாலும் தமிழ் மக்கள் மத்தியில் அத்துயர சம்பவம் ஏற்படுத்திய வடு இந்த கணம்வரை மாறாது உள்ளது.

யாழ் நூலகம்

ஜே.ஆர்.ஜெயவர்தனவின் ஐக்கிய தேசிய கட்சியின் அரசாங்கத்தின் ஆட்சி காலத்தில் திட்டமிட்டு நடத்தப்பட்ட இச் சம்பவமானது தமிழ் மக்களின் அடையாம், அறிவு மற்றும் பண்பாடு போன்றவற்றை இல்லாதொழிக்கும் தமிழ் இன அழிப்பின் ஒரு அடையாளமாகவே தமிழ் மக்கள் இன்றும் பார்க்கின்றார்கள்.

இந்நூலக அழிப்பின் போது பல நூற்றாண்டு பழமைவாய்ந்த தமிழ், ஆங்கில நூல்களும் மற்றும் ஓலைச்சுவடிகளும் அழிந்து போயின.

அழிந்த புத்தகங்கள் எவை?

இவற்றில் கிடைப்பதற்கு அரிதான ஐசாக் தம்பையா நன்கொடை கொடுத்த இலக்கியம், சமயம், மொழியியல் தத்துவம் தொடர்பாக சுமார் 6000 நூல்களும், இந்திய வர்த்தகர் ஒருவரால் கொடுக்கப்பட்ட மகாத்மா காந்தியின் சத்தியசோதனை, 1672 ஆம் ஆண்டில் பிலிப்பஸ் பால்டியார் என்பவர் எழுதிய டச்சு ஆட்சியில் இலங்கை என்னும் நூல், 1660 ஆம் ஆண்டில் கண்டி மன்னரால் சிறைபிடிக்கப்பட்டவேளை றொபேட் நொக்ஸ் என்பவர் எழுதிய இலங்கையராவார் என்னும் நூல் ஆகியவை அழிந்தன.

1585 ஆம் ஆண்டில் கத்தோலிக்க மதத்தலைவர்களால் தமிழில் எழுதப்பட்ட நூல், சேர் பொன்னம்பலம் இராமநாதன் எழுதிய பகவத்கீதை விளக்கம், சித்தாந்தம், செந்தமிழ் இலக்கிய நூல்கள், திருமதி இராமநாதன் அம்மையார் எழுதிய இராமாயாண மொழிபெயர்ப்பு, மகாகவி பாரதியாரின் நண்பரான நெல்லையப்பன் எழுதிய நூல்கள், கடலைக்குடி நடேச சாஸ்திரியார் எழுதிய சோதிட சாஸ்திர நூல்கள், வானசாஸ்த்திரம் சம்பந்தமான நூல்கள், சித்தவைத்திய வாசகங்கள் அடங்கலான ஏட்டுச்சுவடிகள் ஆகியவை அழிந்தன.

மேலும், முத்துத்தம்பிபிள்ளை ஏழுதிய அபிதானகோசம், சிங்காரவேலு முதலியார் எழுதிய அபிதான சிந்தாமணி, முதலியார் இராசநாயகம் எழுதிய புராதன யாழ்ப்பாணம், சுவாமி ஞானப்பிரகாசம், முத்துத்தம்பிபிள்ளை எழுதிய யாழ்ப்பாணம் பற்றிய நூல்கள், கல்லடி வேலன் என்று அழைக்கப்பெற்ற கே.வேலுப்பிள்ளை இயற்றிய யாழ்ப்பாண வைபவகௌமுகி, சிற்பக்கலை பற்றிய நூல்கள், தனிநாயக அடிகளார் பதிப்பித்து வெளியிடப்பட்ட"தமிழ் கலாசாரம்" எனும் ஆங்கில சஞ்சிகை, இராசையனார், வன்னியசிங்கம், கதிரவேற்பிள்ளை, ஆனந்தகுமாரசாமி மற்றும் முதலியார் குலசபாநாதன் சேகரித்த நூல்கள், மற்றும் 10 ஆயிரத்திற்கு மேற்பட்ட கையெழுத்து பிரதிகளும் அழிவடைந்தன.

யாழ் நூலகம்

இந்நூலகத்தை இலங்கையில் மட்டுமல்ல இந்தியாவின் தமிழ்நாடு உட்பட பல பாகங்களிலிருந்தும் தேடிச் சென்று பயன்படுத்தியிருந்தனர்.

யாழ் பொது நூலக எரிப்பு தொடர்பில் யாழ் பல்கலைக்கழக முன்னாள் துணைவேந்தர் சிரேஸ்ட பேராசிரியர் என்.சண்முகலிங்கன் பிபிசி தமிழுக்கு தனது கருத்துக்களை பகிர்ந்து கொண்டார்

"காலா ரஜினி சொன்னதைத்தான் தூத்துக்குடி மக்கள் செய்தார்கள்"

யாழ் பொது நூலகம் அழிக்கப்பட்டு 37 ஆண்டுகள் கடந்தாலும்கூட அந்த அழிப்பு நடவடிக்கை மூலம் தமிழ் மக்களின் இதயங்களில் ஏற்படுத்திய வடு இன்னமும் மாறாதது.

தென்னாசியாவின் மிகப் பெரிய அறிவியல் பொக்கிஷமாக போற்றப்பட்ட யாழ்ப்பாண பொது நூலகத்தின் அழிப்பு என்பது மனித நாகரிகத்தின் மோசமான துயரம். 1981ஆம் ஆண்டு மே மாதம் 31 ஆம் தேதி நள்ளிரவில் இந்த கொடுமை நேர்ந்த போது அதனை சென் பற்றிக்ஸ் கல்லூரியின் மாடியில் இருந்து நேரில் பார்த்த தாவீது அடிகளார் அந்த கணத்திலேயே உயிரிழந்தார் என்ற செய்தி ஒன்றே அந்த நூலகத்தின் பெறுமதியை எடுத்துக் காட்டுகின்றது.

யாழ்

நூலகம் எரிக்கப்பட்ட மறுநாள் ஜூன் மாதம் முதலாம் தேதி எனது நண்பன் நுகுமானும் நானும், யாழ் பல்கலைக்கழகத்தில் இருந்து துவிச்சக்கர வண்டியில் அங்கு சென்று பார்த்த போது எரிந்த சாம்பல்கள் ஊடாக நாங்கள் கொண்ட துயரமும் வலியும் இந்த கணம்வரை நெஞ்சுக்குள் வலிக்கின்றதாக உள்ளது.

நாங்கள் நூலகத்திற்குச் சென்ற போது அந்த தீ அணையாமல் இருந்தது. நான் சிறுவர் பகுதியில் படித்த புத்தகங்கள் சிலவற்றை இனங்காணக் கூடியதாக இருந்தது.

நூலகத்திற்குள் கம்பீரமாக நின்ற புத்தக அலமாரிகள் எல்லாம் நிலத்திலே பாட்டமாக வீழ்த்து இருந்தது. நாங்கள் கோவிலாக வழிபட வேண்டிய அந்த கட்டடம் எல்லாம் உடைந்து சீமெந்து துகழ்களாகவும், சாம்பலாகவும் காட்சியளித்தது. அன்று பார்த்த அழிவை வார்த்தைகளால் சொல்ல முடியாது.

அங்கு பகுதியளவில் எரிந்த புத்தக துண்டுகள் சிலவற்றை அடையாளமாக எடுத்துச் சென்று எனது வீட்டில் இருந்து நூலகத்தில் வைத்து பாதுகாத்திருந்தேன்.

பின்னர் யுத்தம் காரமாணக ஏற்பட்ட இடம்பெயர்வின் போது என்னுடைய வீட்டில் இருந்த புத்தகங்களோடு அவையும் அழிவடைந்துவிட்டன.

நூலக பாதிப்பை பார்த்த பின்னர் எனது நண்பர் நுகுமான் ஒரு கவிதையினை எழுதியிருந்தார். அந்த கவிதை எரித்து சாம்பலாக்கப்பட்ட நூலகத்தின் நினைவுகளோடு உள்ளது.

புத்த பெருமான் ஒரு இரவிலே சுடப்பட்டார் என்று ஆரம்பிக்கும் அந்த கவிதை இறுதியில் புத்தரின் சிவில் உடையாளர்கள் பிணத்தை உள்ளே இழுத்துச் சென்றனர். 90 ஆயிரம் புத்தகத்தினால் புத்தரின் மேனியை மூடி மறைத்தனர். சிகாலேகவாத சூத்திரத்தை கொழுத்தி எரித்தனர். புத்தரின் சடலம் அஸ்தியானது. தம்ம பதமும் சாம்பலானது என்று முடிகின்றது அந்த கவிதை. நூலக எரிப்பின் குறியீடாக இந்த கவிதை அமைகின்றது.

இவ்வாறான சம்பவங்கள் இலங்கையில் மட்டும் முதல் தடவையாக நடக்கவில்லை. 1930 ஆம் ஆண்டு ஜெர்மனி பேளின் வீதியில் நூற்றுக்கனக்கான புத்தகங்கள் எரிக்கப்பட்டு வீதிகளில் எல்லாம் சாம்பல் பரவியதாக சொல்லுவார்கள்.

நாசிகளின் இனப்படுகொலைக்கு அவ்வழிப்பு பெரும் எடுத்துக்காட்டு. யாழ் நூலக எரிப்பும் தமிழ் இனப்படுகொலை என்றே கருத வேண்டும்.

வரலாற்றில் இருந்து நாங்கள் பாடம் படிக்க தவறுகின்ற போது மீண்டும் மீண்டும் அந்த தவறான வரலாறு மீட்டப்படும் என்பதற்கு இந்த தேசத்தின் வரலாறு சான்றாக இருக்கின்றது.

இந்த நூலக எரிப்பு மூலம் தென்னாசியாவில் இருந்து தேடி வைத்த பொக்கிஷங்கள் குறிப்பாக ஓலைச் சுவடிகள் 1800 ஆம் ஆண்டுக்கான பத்திரிகை பதிவுகள் அனைத்தும் இல்லாமல் ஆக்கப்பட்டுள்ளன.

யாழ் நூலகம் திறக்கப்பட்டது எப்போது?

இவற்றை அழித்துவிட்டு வெறுமனே கட்டடத்திற்கு வெள்ளை பூசுவதால் அழிந்தவற்றை மீள பெற்றுக்கொள்ள முடியாது.

யாழ் நூலக எரிப்பு நாளை நினைவுகூறுவது என்பது மனித நாகரிகத்திலேயே மோசமான அரசியல் செயற்பாட்டில் இருந்து விடுபடும் புதிய பண்பாட்டினை இந்த தேசத்தின் அரசியலும் மக்களும் விழிப்புக் கொள்ளும் நாளாக கொண்டாட வேண்டும் என்பதுதான் எனது விருப்பம் என்றார்.

"காலா ரஜினி சொன்னதைத்தான் தூத்துக்குடி மக்கள் செய்தார்கள்"

யாழ் பொது நூலக எரிப்பு தொடர்பில் பிபிசி தமிழுக்கு, யாழ் பொது நூலக பிரதான நூலகர் சுகந்தி சதாசிவமூர்த்தி தெரிவித்த கருத்துக்கள் இவை.

யாழ் பொது நூலகத்தில் 31 வருடங்கள் நூலகராகவும், பிரதான நூலகராக கடந்த 4 வருடங்களும் கடமையாற்றுகின்றேன்.

யாழ் பொது நூலகம் 1933ஆம் ஆண்டு முதன் முதலில் மு.செல்லப்பா என்ற தனி நபரால் ஆஸ்பத்திரி வீதியில் ஆரம்பிக்கப்பட்டது. பின்னர் படிப்படியாக வளர்ச்சி அடைந்து தற்போது உள்ள கட்டடத்தில் 1959ஆம் ஆண்டு அப்போதைய யாழ் மாநகர முதல்வர் அல்பிரட் துரையாப்பாவினால் திறந்துவைக்கப்பட்டது.

1981 ஆம் ஆண்டு நூலகம் எரிக்கப்பட்ட போது 97 ஆயிரம் புத்தகங்களும், பழமைவாய்ந்த ஓலைச்சுவடிகளும், தனிநபர்களின் சேமிப்பு புத்தகங்களும் முற்று முழுதாக அழிவடைந்தன.

பின்னர் 2004 ஆம் ஆண்டு மீண்டும் புணரமைக்கப்பட்டு நூலகம் திறந்துவைக்கப்பட்டது. தற்போது ஒரு இலட்சத்தி 8 ஆயிரம் புத்தகங்களும், தனிநபர்களால் அன்பளிப்புச் செய்யப்பட்ட ஓலைச்சுவடிகளும் உள்ளது.

யாழ்

இந்தியா அரசாங்கத்தினால் கடந்த வருடம் 16 ஆயிரம் புத்தகங்கள் அன்பளிப்பு செய்யப்பட்டுள்ளன.

நாளாந்தம் பெருமளாவன வாசகர்கள் இந்த நூலகத்தினை பயன்படுதுகின்றார்கள்.

"காலா ரஜினி சொன்னதைத்தான் தூத்துக்குடி மக்கள் செய்தார்கள்"

நூலக எரிப்பின் நேரடி சாட்சியாளரான யாழ் மாநகர சபையின் முன்னாள் ஆணையாளரும், வடமாகாண சபையின் அவைத் தலைவர் சி.வி.கே.சிவஞானம் யாழ் பொது நூலக எரிப்பு தொடர்பில் பிபிசி தமிழுக்கு தெரிவித்த கருத்துக்கள்,

யாழ்ப்பாண பொது நூலகம் யாழ் மாநகர சபையின் நிர்வாகத்தின் கீழ் 1941 ஆம் ஆண்டில் இருந்து வருகின்றது.

யாழ்

அந் நூலகம் 1981 ஆம் ஆண்டு ஜூன் மாதம் 1 ஆம் திகதி மாவட்ட சபை தேர்தல் கால வன்முறையின் போது எரிக்கப்பட்டது. இலங்கை அரசின் காவல் துறையினரும், அவர்களுடன் இணைந்த கட்டாக்காலிகளும் இணைந்து தமிழ் தேசியத்தின் பொக்கிஷமான நூலகத்தை எரித்தார்கள். இச்சம்பவம் நடைபெற்று 37 வருடங்கள் கடந்துவிட்டன.

அப்போது நடைபெற்ற அராஜகங்களை நேரடியாக நான் பார்த்தவன். அந்த வகையில் நூலக எரிப்பின் நேரடி சாட்சியாக நான் உள்ளேன்.

மாவட்ட சபை தேர்தலுக்காக அன்று யாழில் கூடியிருந்த அமைச்சர்கள் இங்கு ஜக்கிய தேசிய கட்சியின் ஆட்சியை கொண்டுவர வேண்டும் என்ற எண்ணத்தில் இருந்தனர். அந்த தேர்தல் முடிவுகளை மாற்றி அமைக்க வேண்டும் என்ற அவர்களின் செயற்பாட்டை துணிந்து எதிர்த்து நின்ற அரச அதிபர் யோகேந்திரா துரைசுவாமியினால் அவர்களின் சதி முயற்சி முறியடிக்கப்பட்டது.

இதனால் அன்று துரையப்பா விளையாட்டரங்கில் நிலை கொண்டிருந்த காவல்துறையினரும், அவர்களுடன் இணைந்து சிலரும் நூலகத்தை தீக்கிரையாக்கினர்.

நூலகம் எரிக்கப்படும் போது எனக்கு முதலில் திருமதி யோகேந்திரா துரைசுவாமி தகவல் தந்திருந்தார். தகவல் கிடைத்ததும் என்னுடைய வாகனத்தை செலுத்திக் கொண்டு புறப்பட்டேன். வேம்படி சந்தியை அண்மித்த போது பொலிஸார் தடுத்து நிறுத்தினார்கள். மேற்கொண்டு செல்ல வேண்டாம் என்று அச்சுறுத்தினார்கள்.

காவல்துறையின் தடையினை மீறி சப்பல் வீதியை அடைந்த போது அங்கு நின்ற காவல்துறையினர் என்னையும், வாகனத்தையும் சுற்றி நின்று முன்னொக்கிச் செல்லவிடாது தடுத்து நிறுத்தினார்கள்.

இதனையும் மீறி சென்றால் உயிருக்கு ஆபத்து ஏற்படும் என்று அச்சுறுத்தி, துப்பாக்கியின் பிடியால் வாகனத்தின் மீது குத்தி என்னை மேலும் அச்சுறுத்தினார்கள்.

தடுத்து நிறுத்தப்பட்ட நிலையில் சப்பல் வீதியில் நின்று நேசித்து வளர்த்த தமிழ் மக்களின் கலாசார சின்னமாக இருந்த நூலகம் எரிவதை நேரடியாக பார்த்தேன். இந்த வன்முறையை அரசாங்கம்தான் செய்தது என்பதை தெளிவாக தெரிந்து கொண்டேன்.

யாழ்

அன்று 1981 ஜூன் முதலாம் தேதி காலை 5 மணியளவில் எரிந்த நூலகத்திற்கு சென்ற போது அமிர்தலிங்கம் உள்ளிட்டவர்கள் அங்கு நின்றார்கள்.

அங்கு சென்ற பார்த்த போது நூலகத்தில் இருந்து 97 ஆயிரம் புத்தகங்கள் எரிந்து சாம்பலாகி கிடந்தது.ஆனந்தகுமாரசாமியின் பழமைவாயந்த ஏட்டுச் சுவடிகளும் எரிந்து சாம்பலாகிக் கிடந்தது.

நூலக எரிப்பு என்பது கலாசார, கல்வி படுகொலையாகும். இது தமிழ் இனத்தை அச்சுறுத்துகின்ற படுகொலை நிகழ்வாகவே பார்க்கின்றேன்.

மீண்டும் அந்த நூலகத்தை கட்டியெழுப்ப வேண்டும் என்று முயற்சிகள் மேற்கொள்ளப்பட்டன. இதற்காக பல இடங்களில் நிதி சேகரிக்கப்பட்டன.

எரிக்கப்பட்ட நூலகத்தின் முன்பகுதியை நினைவுச் சின்னமாக பேணிக் கொண்டு நூலகத்தின் மேற்குப் பகுதியை புதிதாக நிர்மானித்து 1984 ஆம் ஆண்டு ஜூன் மாதம் 4 ஆம் தேதி பல்வேறு அச்சுறுத்தலுக்கு மத்தியல் புதிதாக நிர்மானிக்கப்பட்ட நூலக பகுதியை அமரர் அமிர்தலிங்கம் ஊடாக நான் திறந்து வைத்திருந்தேன்.

இதன் பின்னர் யுத்தம் காரணமாகவும் நூலகம் மீண்டும் சிதைக்கப்பட்டது. சிதைக்கப்பட்ட நூலகத்தினை புணரமைப்புச் செய்வதற்கு அதன் பின் வந்த அரசாங்கங்கள் முனைப்புக் காட்டியிருந்தன. இதனால் நூலக எரிப்பினை நினைவு கூறும் வகையில் எங்களால் பாதுகாத்து வைக்கப்பட்டிருந்த நூலகத்தின் முன் பகுதி முழுமையாக புணரமைக்கப்பட்டு, நூலக எரிப்பின் சான்றும் அரசாங்கத்தால் திட்டமிட்டு இல்லாமல் செய்யப்பட்டுள்ளது.

புதுப்பிக்கப்பட்ட பின்னர் நவீனத்துவத்துடன் தற்போது இயங்கி வருகின்றது. குறிப்பாக கணினி உட்பட பல்வேறு வசதி வாய்ப்புக்கள் அங்கு உள்ளது. இருந்த போதும் நாங்கள் இழந்த தமிழ் மக்களின் ஓலைச் சுவடிகள் உட்பட பல பொக்கிஷங்களை மீண்டும் பெற்றுக் கொள்ள முடியாத நிலையிலேதான் இருக்கின்றோம்.

இது ஒரு காலத்தினுடைய கலாசார படுகொலையின் சுவடாகவே யாழ் பொது நூலக எரிப்பினை பார்க்கின்றேன் என்றார்.

"காலா ரஜினி சொன்னதைத்தான் தூத்துக்குடி மக்கள் செய்தார்கள்"

யாழ் பொது நூலக எரிப்பு தொடர்பில் பதிப்பாளரும் சிவசேனை அமைப்பின் இலங்கை தலைவர் மறவன்புலவு க.சச்சிதானந்தம் பிபிசி தமிழுக்கு தெரிவித்த கருத்துக்கள்,

யாழ்

யாழ்ப்பாண நூலகத்தை 1981 மே 31 அல்லது ஜூன் முதலாம் தேதி அழிக்க நினைத்தவர்கள் தமிழர்களை வேரோடும் மண்ணின் மரபோடும் அழிக்க நினைத்தவர்கள்.

அவர்களுடைய எண்ணம் நிறைவேறாது. தமிழர்கள் பீனிக்ஸ் பறவையை போன்றவர்கள். அழிவடைந்த சாம்பலில் இருந்து தமிழர்கள் மீண்டெழுவார்கள்.

அன்பும் அறனும் அருளும் என்று பாடிய பெருந்தகைகள் வாழ்ந்த இந்த மண்ணிலே இருந்த இந்த நூலகத்தை எரித்து தமிழ் இனத்தை மண்ணோடு மண்ணாக்கலாம் என்ற கணவு கண்டவர்கள் இன்று அதில் தோற்றுப் போய்விட்டார்கள்.

தமிழர்கள் இன்று நிமிர்ந்து நிற்கின்றார்கள். எந்த அழிவுகளையும் எதிர் கொள்ள தயாராக இருக்கின்றோம் என்றார்.

'; (function() { var dsq = document.createElement('script'); dsq.type = 'text/javascript'; dsq.async = true; dsq.src = '//' + disqus_shortname + '.disqus.com/embed.js'; (document.getElementsByTagName('head')[0] || document.getElementsByTagName('body')[0]).appendChild(dsq); })();