பேக்கரி உற்பத்திகளின் விலையை அதிகரிப்பது குறித்த தீர்மானம்!!

கோதுமை மாவின் விலை அதிகரிப்புடன், பாண் உள்ளிட்ட தமது உற்பத்திகளின் விலையை அதிகரிப்பது தொடர்பில் இன்று (17) தீர்மானிக்கப்படவுள்ளதாக, வெதுப்பகம்(பேக்கரி) உரிமையாளர்கள் சங்கம் தெரிவித்துள்ளது.

கோதுமையின் விலை அதிகரிப்பிற்கு ஏற்ப, பேக்கரி உற்பத்திகளின் விலையை 3 ரூபா முதல் 5 ரூபா வரை அதிகரிக்க வேண்டும் என, சங்கத்தின் தலைவர் N.K. ஜயவர்தன குறிப்பிட்டுள்ளார்.

கோதுமை மா ஒரு கிலோகிராமின் விலையை நேற்று முதல் 7 ரூபாவால் அதிகரிப்பதற்கு, பிறீமா மற்றும் செரண்டிப் நிறுவனங்கள் நடவடிக்கை எடுத்துள்ளன.

இதேவேளை, கோதுமை மாவின் விலை அதிகரிப்பு தொடர்பில் நாட்டிலுள்ள அனைத்து விற்பனை முகவர்களுக்கும் அறிவுறுத்தப்பட்டுள்ளதாக, குறித்த நிறுவனம் தெரிவித்துள்ளது.

கோதுமை மாவின் விலையை 7 ரூபாவால் அதிகரித்துள்ள நிலையில், ஒரு கிலோகிராம் கோதுமை மாவின் விலை வரியுடன் சந்தையில் 8 ரூபா 50 சதத்தால் அதிகரிக்கும் என, பிறீமா நிறுவனம் குறிப்பிட்டுள்ளது.

அமெரிக்க டொலரின் பெறுமதியுடன் ஒப்பிடுகையில், ரூபாவின் பெறுமதி வீழ்ச்சியடைந்தமை காரணமாக 7 மாதங்களுக்கு முன்னர் மாவின் விலையை அதிகரிப்பதற்குத் தீர்மானித்ததாக, பிறீமா நிறுவனம் தெரிவித்துள்ளது.